===KONFERÉNSIA IMPRENSA===

21 MARSU 2021, 16H00

Dr. Rui Maria de Araújo

Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS)

Ohin, loron 21 marsu 2021, hodi Centro Integrado Gestão de Crises-Sala Situação (CIGC-SS) nia naran, hakarak hato’o ba jornalista no ba públiku tomak, informasaun hanesan tuirmai:

✅KOMPLETA TINAN 1, HAHÚ DETETA KAZU COVID-19 IHA TIMOR-LESTE

Ohin Timor-Leste kompleta tinan 1, sura husi momentu hahú deteta kazu Covid-19, iha 21 de Marsu 2020. Dadus ne’ebé iha, hatudu katak husi 21 marsu 2020 to’o 22 fevereiru 2021, kazu Covid-19 ne’ebé deteta iha Timor-Leste, importadu, no esporádiku.

Hahú 22 de Fevereiru 2021, hafoin deteta kazu iha Aldeia Klauhalek, Suku Belulik Leten, Postu Administrativu Fatumea, Munisipiu Covalima, Timor-Leste hahú tama iha faze transmisaun cluster ka transmisaun lokal, tuir definisaun OMS nian. Iha fulan ida ikus nia laran, fenómenu transmisaun kluster espalla mós iha Kapital Dili, Munisipiu Baucau no Munisipiu Viqueque.

✅EVOLUSAUN SURTU COVID-19 IHA MUNISIPIU DILI

Ohin, iha Munisipiu Dili iha kazu foun 43, ho detalles hanesan tuir mai:

➡️Kazu pozitivu 1, hela iha Aldeia Berbidu, Suku Becora, Posto Administrativu Cristo Rei. Pozitivu ida ne’e kontaktu-besik ho kazu konfirmadu iha cluster HNGV.

➡️Kazu pozitivu 9, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía horiseik, dia 20 de Marsu.

➡️Kazu pozitivu 26, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan.

➡️Kazu pozitivu 7, hela iha Aldeia Grilos, Suku Gricenfor, Postu Administrativu Nain Feto. Pozitivu hirak ne’e kontaktu-besik ho kazu husi cluster hanesan.

Ho nune’e, kazu detetadu ka pozitivu iha Munisipiu Dili husi dia 7 de Marsu 2021, to’o ohin, 21 de Marsu de 2021, hamutuk hotu 179. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, hetan revizaun hanesan tuir mai:

Kazu detetadu 179 iha Dili ne’e, fahe ba cluster 34, namkari iha instituisaun 4, eventu 1 & Suku 10, & fatin kuarentena 1, iha Postu Administrativu D. Aleixo, Vera Cruz, Nain Feto & Cristo Rei. Husi cluster 34 ne’ebé iha, iha cluster 14 maka kazu laaumenta iha semana ida nia laran ona.

✅EVOLUSAUN SURTU COVID-19 IHA MUNISIPIU BAUCAU

Iha Munisipiu Baucau, ohin iha kazu foun 11. Hamutuk hotu Munisipiu Baucau deteta ona kazu konfirmadu nain 19. Kazu foun hirak ne’e, hela iha Aldeia Builai, Suku Buibau, Baucau Vila. Kazu konfirmadu hirak kontaktu-besik ho kazu husi Aldeia Lamegua ne’ebé anunsia iha dia 19 de Marsu. 

✅EVOLUSAUN SURTU COVID-19 IHA MUNISIPIU VIQUEQUE

Iha Munisipiu Viquque, ohin iha kazu foun 1. Hamutuk hotu Munisipiu Viqueque deteta ona kazu konfirmadu nain 4. Kazu foun ida ne’e, hela iha Aldeia Mamaluk (Beloi), Suku Karaubalu, Viqueque. Kazu konfirmadu ida ne’e kontaktu-besik ho profisionál saúde ne’ebé halo kursu pós-laboral iha UNTL & fila husi Dili ba Viqueque iha dia 8 de Março.

✅ATIVIDADE PREVENSAUN

Baca Juga : Timor-Leste Komemora Loron Mundial Fase Liman Ho Sabaun

& MITIGASAUN COVID-19 IHA MUNSIPIU SIRA SELUK & RAEOA

↗️Atividade prevensaun no mitigasaun Covid-19 iha Munisipiu sira seluk la’o hanesan baibain.

↗️Tuir Planu Kontinjénsia Governu nian, Timor-Leste iha faze Alerta 3, ka iha Faze Mitigasaun.

✅DADUS JERAL:

1️⃣Kazu foun ohin: 55

2️⃣Kazu rekuperadu: 3

3️⃣Kazu ativu: 206

• Kazu nain 55 ohin, iha mane 23, feto 32

• Ema ho idade tinan 0-14: 13

• Ema ho idade entre tinan 16-67: 42

• Ema sintomátiku: 9

• Ema asintomátiku: 46

4️⃣Husi horiseik mai ohin hamutuk hotu halo 425 testes PCR.

✅ESPLIKASAUN ADISIONÁL

▶️Husi kazu ativu ne’ebé iha izolamentu, iha ida ne’ebé tama kategoria moderadu. Kazu ida ne’e sofre insufisiensia renal kronika, no halo hemodiálize durante tinan rua ona. Kazu ida ne’e detetadu pozitivu loron rua liu-bá. Ninia oráriu hemodiálize kinta-feira ho segunda-feira.

Iha kinta-feira dia 18 de Marsu la konsegue halo hemodiálize tamba unidade hemodiálize HNGV taka hodi halo dezinfesaun. Horikalan iha sala izolamentu Tasitolu, nia iha problema oksijenasaun, no ekipa médika izolamentu nian deside transfere ba Vera Cruz nu’udar fatin ne’ebé preparadu atu halo izolamentu ba kazu moderadu sira.

To’o loriak ne’e ninia kondisaun estável. Nia kontinua halo tratamentu ba hipertensaun no aban ninia oráriu atu halo hemodiálize iha HNGV, ne’ebé prepara ona fatin espesiál ba halo hemodiálize ba ema sira ne’ebé mós pozitivu SARS-CoV-2.

▶️Iha mós kazu ida, inan isin-rua, idade tinan 27, horisiek iha hemorajia, ka fakar-ran. Señora ida ne’e iha istória abortu, ho ida ne’e dala rua ona. Horikalan ekipa médika transfere ba Vera Cruz hodi halo intervesaun husi espesialista sira. Oras ne’e dadaun kondisaun estável, no sei transfere hikas ba izolamentu Tasitolu. 

✅APELU

1️⃣Nafatin apela ba populasaun ne’ebé saí husi Dili ba munisipiu sira seluk, entre dia 5 to’o dia 9 de Marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu. Apela mós ba komunidade iha munisipiu sira hotu, wainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira.

2️⃣Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona:

↘️Uza máskara

↘️Fase liman beibeik ho sabaun ka dezinfetante ruma

↘️Evita kose liman ba matan, inus ho ibun

↘️Wainhira kumprimenta malu, lapresiza ka’er liman, bensa-liman, rei-malu ka haku’ak malu

↘️Evita halibur malu barak

↘️Hamriik ka tur dook husi ema seluk, mínimu metru ida ho balun.

#MédiaPaláciodasCinzas