Joven ida ho naran, Joanico Ferreira Gusmão (25), ohin, tuku 15:00 Otl, monu husi has leten no mate fatin tanba hetan soke husi enerjia eletrisidade.

Joanico hetan estrum tanba uza besi hodi ku’u has fuan iha uma oin iha area Fatuhada, Comoro, Dili, no besi nee ka’it kona fiu eletrisidade ne’ebé iha hela enerjia. Akontesimentu ne’e halo família inklui viziñu no populasaun Suku Fatuhada sente trauma hodi tanis bainhira haree direita vítima ninia isin mate ne’ebé latan hela iha rai leten.

Matebian Joanico moris iha Aldeia Laconac Baru, Suku Debos, Postu Administrativu Suai Vila, Munisípiu Covalima, iha loron 26/06/1994. Durante ne’e nia mai Dili hela ho família iha Raicotu, Tasi Tolu, hafoin ida ne’e vítima ba hela hamutuk ho nia namorada, Abelina Graziela dos Reis Belo (20) husi Postu Administrativu Qulecai, Munisipiu Baucau iha Fatuhada.

Abelina Graziela dos Reis Belo hateten, hafoin han meudia, vítima no nia alin sira tuur halimar iha uma oin, hafoin ida ne’e vítima haree has tasak barak, tanba ne’e ho inisiativa vítima lori besi kait sa’e ba has leten hodi hakait has tasak. Derrepente eletrisidade sirkúitu soke kedas vítima.

Hafoin akontesimentu, Xefe Suku Fatuhada Marcelino Soares ho membru Konsellu Polisiamentu Komunitária (KPK) no Polisia Nasional Servisu Investigasaun Kriminál (PNSIK) ho ekipa Eletrisidade de Timor-Leste (EDTL) too kedas iha fatin hodi sukat fatin akontesimentu no lori vítima ba Ospitál Nasional Guido Valadares hodi hala’o autópsia.

Xefe Koordenadór Eletrisidade de Timor-Leste (EDTL) Anselmo dos Santos,

Baca Juga : HOSPITAL SANGLAH FO ULTIMATU BA GUVERNO

rekoñese, vítima mate tanba besi kait has nian ne’ebé vítima uza, kait kona fali fiu liña eletrisidade ho korrente makaas maka soke fali vítima too mate.

“Ita haree fiu mutin tolu ne’e kuandu besik iha haas leten hanesan ne’e perigozu tebes, tanba ninia korrente elétrika 20KV too 380KV enerjia makas tebes kona ita mate kedas hanesan agora ne’e,” Anselmo dos Santos esplika.

Ho akontesimentu ne’e, ekipa EDTL mós tun direita hodi koordena ho EDTL sentrál atu hamate liña eletrisidade área Fatuhada nian para bele fó tempu ba EDTL tesi kotu has hun ne’ebé kona hela fiu eletrisidade.

Tuir relatóriu EDTL nian katak, durante fulan Janeiru too Outubru 2019 nia laran, ema na’in haat maka mate ona tanba enerjia eletrisidade maka soke mate. Sira hirak ne’e; ida mate iha área Gruta Kampu Baru, Dili, nain ida mate iha area Eskola 4 Setembru, Balide, Dili, na’in ida mate Becora no ida ne’e mate iha Fatuhada.

Xefe Suku Fatuhada, Marcelino Soares apela ba komunidade sira ne’ebé kuda ai besik iha uma oin karik kona fiu eletrisidade, di’ak liu koopera ho EDTL para tesi kotu ai ne’e hodi evita asidente sirkúitu eletrisidade nian.

“Ha’u apela ba komunidade ne’ebé kuda ai iha kintál ka uma oin besik fiu eletrisidade di’ak liu bolu EDTL mai tesi, tanba fiu eletrisidade kuandu kona ai bokon bele akontese sirkúitu,” hateten Marcelino Soares.