Bogor 28 Juñu 2018: Espoza Prezidente-da-Repúblika Timor-Leste Cidalia Nobre Mouzinho Guterres hala’o enkontru ho Primeira-dama Indonézia Iriana Jokowi, hodi fahe hanoin ba malu sobre servisu ne’ebé inan ba nasaun rua ne’e hala’o.

Hanesan espoza Prezidente-da-Repúblika papél ida mós atu akompanha xefe-de-estadu hala’o aktividade iha rai laran no estranjeiru inklui asaun karidade seluk. 

“Vizita ida ne’e, ha’u sente onoradu tebe-tebes tanba, ha’u simu hosi Prezidente Repúblika Indonézia nia espoza (Iriana). Durante enkontru (tete a tete) ha’u hato’o ha’u nia apresiasaun boot tebes ba Señora Iriana. Ha’u mós apresia senhora Iriana nia servisu ne’ebé ajuda tebes Prezidente-da-Repúblika Indonézia,” 

Tete a tete ne’e hanesan oportunidade importante ba Espoza Prezidente-da-Repúblika Timor-Leste no Indonezia hodi fahe impresaun no troka esperiensia ba malu hodi bele servi povu rai rua nee ho di’ak liu tan.

Iha sorumutu ne’e Espoza Prezidente-da-Repúblika lori atensaun spesial ba asuntu kankru ne’ebé feto maluk sira enfrenta no haktuir katak sei foti medida imediata balun iha tempu oin mai.

Enkontru espoza Prezidente Timor-Leste no Indonézia ne’e hakotu ho troka prendas no almosu ofisial iha Palásiu Bogor, Indonezia.