Ministériu Agrikultura no Peska (MAP) liuhosi Diresaun Nasionál Konservasaun Natureza (DNKN) rejeita informasaun ne’ebé públika iha mídia sosiál katak rusa fuik sira iha illa Jaco, Postu Administrativu Tutuala, Munisípiu Lautein, balun mate tanba bee laiha.

“Até a data ami seidauk simu informasaun husi guarda floresta no autoridade lokál no MAP Munisípiu Lautein katak rusa fuik balun mate ona iha illa Jaco nian, ne’ebé ami hanoin informasaun sira ne’e la loos no foto ne’e sira foti iha ne’ebé”, haktenik Diretór Nasionál Konservasaun Natureza, João Antalmo, ba Tatoli iha knaar fatin Kaikoli, ohin.

João Antalmo dehan iha kooperasaun di’ak tebes ho guarda florestál no autoridade lokál iha Postu Administrativu Tutuala ne’ebé iha fulan kotuk deteta bee menus iha illa Jaco, ne’ebé DNKN apoia ona bee tonelada ida atu rusa sira bele hemu.

“Ami simu informasaun husi guarda floresta katak bee laiha, ne’ebé ami fornese ona bee tonelada ida hodi lori bá illa Jaco atu ita-nia rusa sira bele hemu liuhusi meiu fera bidón hakoi ba rai no enxe bee mak rusa

Baca Juga : YMCA Empata 1-1 ho AS Marca

hemu”, katak.

Nia adianta bainhira fornese bee tonelada ida ne’e rusa no manu fuik sira konsege hemu no laiha ida mak mate. “Ami-nia ekipa semana oin lori tan bee tonelada ida ba hodi sai rezerva atu hein udan monu rai”, nia afirma.

Kona ba ai-han ba rusa, nia salienta seidauk iha estudu ida kona-ba rusa sira han ai-horis saida, maibé guarda florestál bainhira lori bee ne’e ho ai-horis balun atu rusa sira bele han.

“Iha tinan kotuk ita rejista rusa rua mak mate tanba lori bee bá trade, maibé tinan ne’e ita hatene bailoron naruk ne’ebé ita fornese bee ne’ebé seidauk iha rusa ida mak mate”, hatuir.

Governu liuhosi MAP kada tinan aloka osan rihun $25 atu fornese bee ba illa Jaco atu rusa sira bele hemu bainhira bai-loron naruk. Enkuantu, tuir dadus DNKN, balada fuik sira ne’ebé moris iha illa ne’e mak hanesan rusa hamutuk 80 to’o 100 no manu-fuik sira.