Suspeitu CDJ ne’ebé segunda (14/10/2019), tuku 14:00 OTL, lori motor atu soke aviaun Siriwijaya Air la’ós otas joven. Maibé, nia ho idade tinan 45 no iha ona oan na’in 12.

Espekulasaun husi públiku ne’ebé viral loos iha rede sosiál Facebook, katak, suspeitu ne’ebé uza kamizola Universidade da Paz (UNPAZ) nian ne’e “obriga-an” no “tau-an” iha risku lori motor atu soke aviaun iha Aeroportu Internasionál Prezidente Nicolau Lobato, Comoro, Dili, tanba frustradu ho nia ‘namorada’ atu ba eskola iha rai li’ur ne’e laloos.

Polisia Nasionál Servisu Investigasaun Kriminál (PNCIC-sigla portugés) loke ona investigasaun ba suspeitu no nota katak, suspeitu konsege ho motor halai tama to’o pista aeroportu nian tanba seguransa iha aeroportu fraku tebes.

Momentu ne’ebá aviaun Sriwijaya Air mai husi Bali-Indonézia tula pasajeiru 100 kompostu husi pilotu rua, aeromoza na’in neen (6) inklui bainaka embaixadór estranjeiru na’in rua.

Avian mai tun husi parte oeste atu ba fila iha área leste, no suspeitu ho motór honda la uza xapa partíkula halai hasoru fali aviaun, tanba ne’e autoridade sira aviasaun nian halo kedas medida intervensaun hodi tebe monu suspeitu husi motor leten, nune’e suspeitu la konsege soke aviaun.

Suspeitu CDJ (tinan 45) husi Aldeia Lacoiku, Suku Railaco, Postu Administrativu Railaco, Munisipiu Ermera, iha oan nain 12 kompostu feto sia (9) mane tolu (3) ne’ebé durante ne’e moris nu’udar agrikultór.

Xefe PNSIK, Superintendente Xefe Henrique da Costa dehan, kazu ne’e akontese tanba kontrolu husi seguransa ne’ebé fraku hodi halo suspeitu konsege lori motór tama ba pista aeroportu.

“Ita halo ona investigasaun, tanba suspeitu lori motór tenta soke aviaun Sriwijaya iha momentu prosesu atu landing hela ne’e perigozu tebes ba aviaun no pasajeiru sira,” esklarese Henrique ba jornalista, ohin, iha Komandu PNTL, Caicoli, Dili.

Ho problema ne’e, Ekipa PNTL, Autoridade Nasionál Aviasaun Timor-Leste (ANATL), Bombeiro halo kedas medida atuasaun fragante delitu.

Kazu ne’e rejista ho númeru krime NUK0201/19/PNSIK ne’ebé ninia natureza sei kontinua hala’o investigasaun kle’an depois sei aprezenta ba Ministériu Públiku.

Atu hatene kondisaun saúde suspeitu nian moras mentál ou lae, parte PNSIK sei lori suspeitu ba halo teste médiku iha Ospitál Nasional Guido Valadares (HNGV).

Husi sorin seluk, Autoridade Navegasaun Aérea Timor-Leste (ANATL,E.P), Romaldo

Baca Juga : Suspeitu Uza Motor Atu Soke Aviaun Sriwijaya Laos Joven

da Silva, rekoñese, problema ne’e akontese tanba kontrola seguransa ne’ebé frajil. Tanba ne’e ANATL hein relatóriu investigasaun husi PNSIK.

“Agora ami mós hela investigasaun polisia nian hotu maka ita bele ko’alia,” informa Diretór Romaldo ba jornalista iha Aeroportu Prezidente Nicolau Lobato, Comoro, Dili.

Nia dehan, ANATL kontinua koopera ho Unidade Patrullamentu Fronteira (UPM), Seguransa Sivíl hodi hametin liu tan seguransa iha Aeroportu laran.

Too notísia ne’e, públika Ajénsia TATOLI rasik seidauk halo konfirmasaun ho parte Kompañia Sriwijaya iha Timor-Leste kona-ba problema ne’e.

Familia Sente Hakfodak

Entretantu iha parte seluk, Martino Martins nu’udar reprezentante família nu’udar mós rian deklara akontesimentu ne’e halo família sira, inklui komunidade Aldeia Lacoiku hakfodak tebes bainhira rona sira suspeitu lori motór tenta soke aviaun.

“Kazu ne’e akontese horiseik too ohin maka polisia kontaktu ami família foin rona no sente hakfodak hodi mai kedas Dili,” Martino Martins hateten.

Familia sira fó sasin katak, suspeitu ema ida kómiku ten no nia moris lor-loron iha de’it to’os laran. Mezmu nia gosta hemu tua mas nia nunka halo problema iha nia moris.

“Katuas durante ne’e hanesan agrikultór maibé hanesan ema lanu ten ida loro-loron nia gosta hemu tua sabu, serveja de’it, maibé nunka mete iha problema ruma. Foin lalais nia ba hakoi família ida mate iha Oe-Cusse fila mai ne’e maka oin manas tiha hanesan ne’e,” Martino Martins haktuir.

Martino dehan, suspeitu mós durante ne’e nunka sofre moras mentál ruma, maibé dala ruma lanu maka halo suspeitu ho motór la’o arbiru de’it no motór ne’ebé suspeitu uza la’ós ninian, maibé hadau de’it husi ninia rian ne’ebé sira hela viziñu iha Railaco.

Iha fatin hanesan suspeitu nia oan feto datoluk, Joanina Soares (17) sente trauma bainhira rona sira nia aman hetan kaer, tanba tenta lori motór soke aviaun.

Nia dehan, iha domingu (13/10) kalan liubá, sira família sei hamutuk hotu iha uma, no iha segunda (14/10) dadeer, sira nia aman foti motór sai husi uma la kasu lia ruma ba sira.

Nia dehan, nia aman durante ne’e servisu nu’udar agrikultór halo toos fa’an modo, tomate no produtu lokál seluk tan ne’ebé kuda iha sira nia kintál. Sira koñese sira nia aman ema laran maus, kómiku-ten no gosta hemu tua.