Ministériu Turizmu (MT), Ministériu Administrasaun Estatál (MAE) no Dioseze Dili asina ona rezolusaun Konjunta hodi suspende no taka provizóriu asesu públiku ka peregrinu bá foho Ramelau durante fulan tolu hahú husi 14 Juñu to’o 7 Outubru 2018 atu hadi’a no prepara kondisaun di’ak ba vizitante no peregrinu sira.

MT nu’udar órgaun Governu ne’ebé responsavel ba jestaun sítiu turístiku sira, MAE ne’ebé responsavel ba jestaun administrasaun territóriu Timor-Leste tomak no Dioseze Dili hanesan entidade másima responsavel ba atividade relijioza iha Dioseze Dili deklara hodi responde ba akontesimentu iha Ramelau no asegura nafatin sítiu refere nu’udar fatin sagradu no iha poténsia hodi dezenvolve turizmu relijiozu ne’ebé sustentável, nune’e instituisaun tolu ne’e delibera rezolusaun mak apela ba komunidade hotu atu respeita no valoriza fatin no espasu relijiozu ne’e.

“Suspende no taka provizoriamente asesu públiku ba Ramelau hahú husi loron 14 juñu to’o loron 7 outubru 2018 hodi hadi’a no restritu santidade husi fatin refere nó mós instituisaun tolu ne’e sei koordena hamutuk atu hadi’a no prepara kondisaun di’ak ba vizitante no peregrinu sira”, Konselleiru Dioseze Dili, Padre Lugério Martins da Silva, hatete iha Rezidénsia Episkopál Dioseze Dili, horisehik.

Ho envolvimentu husi parte tolu ne’e no komunidade iha Hatubuiliku konstitui komisaun Konjunta ba jestaun sítiu turístiku Nossa Señora Ramelau. Ekipa Konjunta ne’ebé temi ne’e konsidera nu’udar referénsia ba jestaun sítiu turístiku relijiozu tomak iha Timor-Leste partikularmente iha Dioseze Dili.

“Ekipa refere obrigatóriu halo relatóriu no hato’o ba responsavel másima husi instituisaun tolu ne’ebé asina rezolusaun ne’e nó mós entidade relevante seluk”.

Ministru Administrasaun Estatál, Valentim Ximenes, hatete ekipa ne’ebé monta entre ministériu tolu no Dioseze Dili iha Hatubuiliku ne’e oinsá atu jere jestaun no rezolusaun ne’e sei gia ema hotu atubele mantein beleza foho lulik Ramelau.

Bispu Dioseze Dili, Don Virgílio do Carmo da Silva, hatete durante ne’e ema hotu hatene saida mak akontese, nune’e nu’udar sarani no timoroan sertamente haree imajen sira ne’e ho fotografia ida de’it fó ona mensajen boot ona ba timoroan hodi husu timoroan nia devosaun ba Na’i-Feto ne’e to’o iha ne’ebé.

“Ida ne’e mak timoroan ida nia fiar ou sarani timoroan nia fiar ita bele hatudu maneira hirak ne’e? Entaun ida ne’e provoka duni ami atubele halo buat ruma, tan ne�

Baca Juga : PNTL Kaptura Suspeitu Fa’an Labarik

��e ami mai tuur hamutuk ho na’i-ulun sira Governu ida ne’e nian liuliu ba iha Ministériu Turizmu, Estatál, Floresta no Ambiente nian, ami deside fó sai ba públiku kona-ba deklarasaun”.

Ho deklarasaun ne’e atu fó atensaun ba ita katak ita hotu hadomi Ramelau, hadomi ita Na’i-Feto tan ne’e fó tempu provizóriu ba ekipa task force ne’e mak sei hala’o knaar ida ne’e.

“Hamoos tiha lai foho Ramelau lixu hotu ne’ebé durante fulan hirak ne’e bá soe. Kuandu hamoos tiha ona tempu mós ekipa ne’e bele organiza uitoan norma, regra, kritériu ruma kuandu vizitante ka turista sira ne’ebé sa’e tenke haruuk ba norma ne’ebé iha atu labele repete tan atu sira ne’e”.

Tanba ne’e peregrinu bá Ramelau sei komesa fali iha 7 outubru tanba iha kada tinan loron ne’e hanesan loron peregrinasaun nasionál bá Ramelau. “Entaun iha dia 7 loke filafali, karik seidauk bele kria kondisaun ne’ebé kompletu hotu, maibé iha ona kondisaun mínimu ne’ebé bele simu fali peregrinu”.

Bainhira loke filafali sai hanesan momentu ida atu hanoin tempu ida ba Na’i-Feto hodi halo reparasaun espirituál katak durante atitude hirak ne’ebé halo lá tuir sarani nian, iha momentu ne’e hamutuk, hakruuk ho haraik-an hodi monu ain ba Na’i-Feto.

“Ita konsidera Ramelau nu’udar foho santu, ita mós buka atu hasantu fali, tau fali foho iha nia fatin nu’udar santu ba timoroan sira atu ita tane aas nafatin hanesan uluk ita-nia beiala sira haree ba Ramelau”.

MT, Manuel Vong, hatete ekipa task force ne’e sei tun iha aban atu hahú halo levantamentu iha fatin turístiku Ramelau, halo regra para asegura duni funsionamentu fatin ne’e, estabelese organizasun jestaun destinu turístiku iha sítiu ne’e, fó asisténsia no advokasia ba abitante no vizitante ne’ebé bá no ekipa bele mós halo planu no implementasaun, monitorizasaun no avaliasaun ba serbisu tomak.

“Ha’u apela ba komunidade lokál sira atu sai uma na’in di’ak no prepara an atu simu vizitante sira. Dia 7 outubru sei loke fali, sarani barak sei bá, iha mementu ida ne’e mós atubele fó kontribuisaun ruma. Apela labele halo hahalok ida ne’ebé estraga fali ema nia sasán”.

Jornalista : Maria Auxiliadora

Editór : Manuel Pinto