–Kampiaun Liga Voleiból Timor-Leste époka tinan kotuk, AD SLB, tenke entrega nia títulu kampiaun ba Klube Choque hafoin lakon 3-2 iha jogu finál Liga Voleiból époka 2019 ne’ebé hala’o iha kampu voleiból Sekretaria Estadu Juventude no Desportu (SEJD), Lecidere, Dili, domingu ne’e.

AD SLB iha jogu finál ne’e konsege lidera jogu iha set dahuluk ho vitória 25-19, maibé tama ba set daruak, Choque halo jogu sai empata 1-1, hafoin manán ho skoru 19-25. Tama ba set datoluk, AD SLB lidera tan fali jogu sai 2-1 hafoin manán ho skoru 25-13.

Mehi AD SLB atu repete títulu kampiaun loloos akontese iha set dahaat, maibé Choque konsege hakoi mehi klube ne’ebé koñesidu ho naran Makikit Laulara ne’e. Iha set ne’e, Choque konsege halo jogu sai impata tan 2-2 hafoin manán 19-25.

Ho rezultadu impata, jogu kontinua set tan hodi determina sé mak sai kampiaun ba epoka 2019. Iha jogu ne’e, klube rua hadau malu poin, maibé ikus Choque sai kampiaun hafoin manán ho skoru 12-15.

“SEJD kontinua apoiu ba kontinuasaun Liga Voleiból, inklui mós ba federasaun seluk ne’ebé iha nune’e bele fasilita klube ho nia jogadór sira hatudu sira-nia kompetisaun,” Sekretáriu Estadu Juventude no Desportu, Nélio Isaac Sarmento dehan iha nia deskursu.

Klube foun Lalenok United ne’ebé lidera hosi Pedro Belo ho Genilda Gusmão konsege hadau pozisaun datoluk, no Académica UNTL iha pozisaun dahaat.

Iha feto nian, AD SLB konsege sai kampiaun hafoin iha finál halakon Lalenok United ho skoru 3-0 (25-16, 25-22 no 25-18).

Ba pozisaun datoluk hadau hosi klube Académica UNTL no Citra Mares iha pozisaun dahaat.

Iha epoka ne’e, sai mellór jogadór maka Aduano Silvano Felix da Silva hosi

Baca Juga : Polisia tiru mate ema nain tolu no hakanek nain lima Julio Hornay kondena makas

klube Choque no ba feto maka hosi klube AD SLB, Letícia F. Alinde Sousa.

Ba mellór spiker mak Adelijia Caminha (AD SLB) no Jean Christian A. da Silva (Choque). Mellór Tosser monu ba Meidy Rodili Rachman (Lalenok United) no Erwin Rusni (Choque).

Ba mellór ekipa feto nian monu ba Citra Mares, entretantu ba mane komisaun la hetan tanba la prenxe kritéria.

Iha époka ne’e, komisaun mós fó onra ba jogadór tinan ki’ik hanesan Jefranho da Silva Neves hosi Choque no feto ba Mariani Maria Ximenes hosi Citra Mares ne’ebé na’in-rua ne’e ho idade tinan 15.

Komisaun mós fó onra ba mellór adeptu ne’ebé fó ba Virgílio Duarte Fernandes Soares hosi Munisípiu Lautém.

Liga Voleiból Timor-Leste époka 2019 partisipa hosi klube 12 ba feto no mane. Klube sira-ne’e maka Académica UNTL, AD SLB, ADR União, Atone Ambeno, Café, Choque, Citra Mares, Fitun Lorosa’e, Lalenok United, Laloran Fronteira, Masakre Muapitine no USET.

Totál jogadór ne’ebé joga hamutuk feto 110 no mane 110 ho partisipasaun jogadór estranjeiru hamutuk 18 (feto 8, mane 10).

Liga ne’e hetan apoiu orsamentu hosi SEJD hamutuk US$ 71, 335.00.

Kampiaun ba epoka 2019 feto ho mane hetan osan ho valór US$ 8,000.00, US$ 6,000.00 (pozisaun daruak), US$ 4,000.00 (pozisaun datoluk) no US$ 2,000.00 (pozisaun dahaat).

“Orsamentu ne’ebé SEJD apoiu hamutuk US$ 47,000.00 aloka ba manán-na’in sira, restu uza ba operasionál no nesesidade komisaun,” informa Inocêncio de Araújo, Prezidenti Federasaun Voleiból Timor-Leste