Komunidade ho labarik sira hili hodi haloot didi’ak fali sigarru liu prazu ne’e hodi sira konsume no balun sira fa’an fali ba komunidade seluk.

Labarik ki’ik kuaze liu na’in 10 ho kontente hala’o atividade kee fila fali rai kuak hodi foti sigarru ne’ebé halo ona destruisaun ka sunu motuk, maibé ahi la konsege han hotu kedas tanba ne’e sira rekolla lori ba fa’an.

Francisco Miguel (10) ho Mariano de Lima Gomes (8) haktuir, sigarru ne’e Autoridade Inspesaun Fiskalizasaun Atividade Ekonomia Sanitaria no Alimentár (AIFAESA,I.P.) no Kompañia LISUN maka ba soe no sunu iha kuarta (23/10/2019) .

Labarik rua akompaña ho sira nia kolega taka oin metin ne’e dehan, rai kuak ne’ebé autoridade sira kee ladún naruk no kuantidade sigarru barak liu. Ne’e bainhira sunu, ahi konsege han hotu kedas, tanba ne’e, kaixa hirak ne’ebé ahi la han sira foti fali hodi lori ba fa’an.

“Ami ho maun sira mai haree sigarru ema mai sunu la hotu. Tanba ne’e, dezde kinta to’o sesta ohin, ami kee fila fali rai kuak hodi hasai sigarru balun tomak hela hamoos lori ba fa’an fila fali masu ida $0,50 too $1,00 no balu slop no kaixa tomak ema sosa hotu. Tanba ne’e loron rua ona ami mai kee hodi foti sigarru balun sei tomak no moos hela,” hateten Francisco Miguel ba Ajénsia TATOLI iha

Baca Juga : Kruzeiru ho Turista 82 Vizita Sitiu Turistiku iha TL

Lixu Tibar.

Bainhira halo observasaun, jornalista TATOLI halo esplikasaun hodi konvense labarik sira a kona-ba impaktu sigarru liu prazu ne’ebé foti lori ba fa’an bele afeta ba ema seluk nia saúde, maibé labarik sira la preokupa, tanba sira lori ba fa’an ema balun kontinua sosa nafatin.

“Ami la fuma ida maun (jornalista), ami lori ba uma maka fa’an, tanba ema sosa hela ne’e,” hateten Mário ho espresaun kontente hodi kontinua hili sigarru tau ba kaixa ne’ebé nia prepara ona.

Rai kuak ne’ebé parte autoridade sira kee ladún naruk, nune’e bainhira halo tiha destruisaun ahi la konsege han sigarru too hotu. Nune’e mós rai kuak ne’ebé la taka, fó oportunidade ba komunidade ba kee rai hodi foti sigarru masu no slop ne’ebé sei ho kondisaun di’ak.

Iha fatin destruisaun ne’e, nota sigarru lolon no masu tomak labarik sira hasai hosi rai kuak soe namkari arbiru iha rai leten.

Bazeia ba dadus ne’ebé fó sai AIFAESA no Kompañia LISUN totál sigarru DUNHIIL ne’ebé sira lori ba halo destruisaun ho kuantidade keixa 421.50 no slop hamutuk 21.075.

Razaun Empreza Lisun foti hodi halo destruisaun ba sigarru ne’e tanba kualidade husi sigarru DUNHIIL ne’e la tuir ona padraun sigarru ne’ebé di’ak.