Conteudo Seluk

HOSPITAL SANGLAH FO ULTIMATU BA GUVERNO

Diretor Nasional Apoiu Hospitalar no Emerjensia, Horacio Sarmento, informa, Hospital Sanglah Bali-Indonesia, fo ona ultimatu ba Governu Timor Leste (TL) atu tenki selu dívida hamutuk,  800.000 USD, (oito centos Mil), ne’ebé seidauk selu hahú husi fulan Marsu to’o fulan Jullu, tinan ne’e.
Horacio hateten, Hospital Sanglah Bali, fo ona ultimatu mai Governu Timor Leste atu hakarak ka lakohi tenki selu inisiu fulan Agusto tanba bainhira la selu iha fulan refere mak Hospital Sanglah sei haruka obrigatoriu pasiente transferensia husi Timor iha Hospital refere sein rajaun.
Horacio hatutan, nia parte simu ona informasaun ultimatu husi pontu vokal Ministério Saúde iha Hospital Sanglah Denpasar Bali, katak tempu ikus ba Governu Timor Leste atu selu dívida.
“Ita iha problema oituan iha pagamentu, iha dívida iha Hospital Sanglah hamutuk oito centos mil (800.000 USD),  dívida ne’e ba pasiente komun ho pasientes veteranus sira sira ne’e be mak ita seidauk selu, hahú husi fulan Marsu too mai Fulan ne’e ita seidauk selu, ida ne’e aminsa ida ona ba ita tanba tuir informasaun husi ita-nia pontu vocal iha ne’eba katak sira lakohi ona atu atende bainhira ita la selu ita nia dívidas ne’ebé mak ih. sira fo ultimatu mai ita hahú husi fim de julho ita tenki selu ona, se lae mak ba inisiu de agusto mak ita la selu sira sei la fo ona atendimentu ba ita nia pasiente sira ne’ebé mak iha neba,”Horacio Sarmento, ba jornalista sira iha Hospital Nasional Guido Valadares (HNGV) Bidau, Dili (31/7/2018).
Horacio haktuir, aminsas ultimatu ne’e sai nu’udar amiasa boot ba pasiente transferensia sira liu-liu ba pasiente fase ran no kemoterapia, liu-liu sira-nia vida.
Horacio afirma, antes ne’e iha Hospital kuaje hat iha Indonesia mak hanesan, Hospital Sanglah, Siliwam no seluk tan mak simu pasiente transferensia husi TL, maibe dadauk ne’e Sanglah mak sei kontinua fo tratamentu ba pasiente transferensia enkuantu Hospital rua seluk la simu ona tanba la selu dívida.
“Agora ita iha deit Hospital Sanglah mak sei simu nafatin pasiente, Hospital Ihill iha Malaysia nia simu pasiente ba kurasaun deit, pasiente kankru, fase ran sira ne’e so Sanglah deit mak simu, Hospital Singapura komesa tinan kotuk sira lakohi simu ita nia pasiente tanba dívidas,Hospital Siliwam mos komesa fulan Fevereiru to’o agora sira lakohi simu ona, tanba iha dívidas kuaje sentu oitenta mil (180.000 USD) ba Hospital Silioam Bali no mos Silioam Jakarta, Singapura ita sei iha dívida kuaje un millaun, tenki selu ba singapura un pontu dois dolar singapura mas ita kompara mai USD ne’e satu juta dolar deit,”Horacio koalia.
Ho Informasaun ultimatu ne’ebé mak Diretor Nasional Apoio Hospitalar no Emerjensia simu, nia parte rekomenda ba lider másimu Ministério Saúde, tenki toma atensaun ba asuntu ne’e tanba nia impaktu sei makaas ba pasiente nain hat nolu resin nia vida.
“Ida ne’e amiasa boot ba ita-nia pasiente sira, tanba ne’e ha’u husu ba governu liu husi MS para bele buka dalan oinsa rezolve lalais problema ne’e nune’e labele fo amiasa ba ita-nia pasiente sira-nia vida,”Horacio rekomenda.
Hatan ba kestaun ne’e, GMN tenta konfirma ho  Vise Ministra Saúde Asuntu Saúde Kuidadu Primaria, Elia Antonio de Araújo dos Reis Amaral, maibe lakohi fo komentariu hodi taka odamatan kareta ba media.
Governu TL alende halo dívida ba iha Hospital Sanglah, iha mos dívida ba Hospital Sira seluk iha Indonesia hanesan Hospital Siliwam no rua seluk tan ho total hamutuk millaun 2.3 USD (dois ponto tres milhões).
Total pasiente hahú husi fulan Janeiru to’o fulan Julu, tinan ne’e, ne’ebé mak halo tratamentu saúde iha Hospital Sanglah Bali hamutuk 90 resin, husi 90 resin ne’e kuaje nain 8 mak mate, 37 fila ona mai Timor no nain 45 kontinua halo tratamentu iha Hospital Sanglah.foti husi GMNTV.TL.

0 Comments

Sign In Sign Up Sign In By Facebook