—Fenómena fahi mate iha territóriu nasionál halo povu preokupa no trauma tebes to’o autoridade kompetente mós halo alerta ida hodi husu komunidade sira la bele lai konsumu na’an fahi tanba fahi lubun mak mate kauza hosi virus ida naran African swine fever (ASF).

Fenómena ne’e bele dehan seidauk da’et mai to’o Munisípiu Ainaro, tanba tuir Diretór Ministériu Agrikultura no Peska (MAP) Munisípiu Ainaro, Lúcio Romeo Ribeiro, rekoñese katak, fahi kuaze 100-resin mak mate, maibé la’ós kauza hosi virus african swine fever (ASF).

“Fahi moras barak hosi Hatu-Udo no Cassa, maibé la’ós kauza hosi virus ASF. Ami identifika ona fahi sira mate iha Ainaro ne’e moras baibain ka gripe,” hateten Lúcio Romeo Ribeiro, hodi responde Agência TATOLI iha nia servisu fatin, MAP Ainaro, segunda (18/11/2019).

Sintoma hosi moras ne’e fahi mak hanesan me’ar depois la-han no isin tuun to’o mate. La hanesan ho virus ASF ne’ebé kona dala ida mate kedas.

“Atu antesipa virus ASF ne’e la bele da’et to’o mai Ainaro, ami nia parte no pekuária nasionál halo peskiza hodi la autoriza ona fahi lori sai hosi Dili ba munisípiu hotu-hotu,

Baca Juga : Bailoro Naruk Afeta Bee Menus iha Suku Atu-Aben

inklui Ainaro,” hateten Diretór MAP Ainaro ne’e.

Atu prevene moras gripe ne’e labele kontinua Ainaro, Diretór MAP Ainaro ne’e fó ona orientasaun ba Ajente Pekuária Suku (APS) ba identifika moras saida de’it tenke halo vasinasaun no aviza beibeik ba komunidade sira atu sulan fahi ho animal sira seluk. Nune’e kuandu hetan moras bele fasil hetan atendimentu hosi APS.

“See moras foun ruma mosu, halo lalais relatóriu hodi haruka ba Dili, nune’e ekipa ajente pekuária nasionál sira bele mai halo vasinasaun,” nia hateten.

Nia hatutan, fahi moras no mate tanba fahi la sulan, luhan laiha, soe fo’er arbiru, ne’e maka afeta ba fahi moras no mate. Tanba ne’e, molok udan monu-rai tenke sulan fali, nune’e labele kona moras no kontaktu lalais APS hodi fó ai-moruk hodi halo prevensaun.

“Karik akontese fahi moras kontaktu ami, karik ami labele sei halo karta ba nasionál,” Diretór MAP Ainaro ne’e fó hanoin ba komunidade.