–Iha kinta ne’e, Grupo Mulheres Parlamentar Timor-Leste (GMPTL) realiza soru-mutuk ho tema “Hadomi Bebé, Hadomi Futuru”, iha Salaun Lalini Larigutu Komisaun Nasionál Eleisaun (CNE- sigla portuges), ho objetivu buka solusaun ba problema soe bebé iha Timor-Leste.

“Grupu Mulheres Parlamentar Timor-Leste realiza soru-mutuk ida-ne’e hodi envolve mós ezekutivu sira, membru Governu sira liuliu iha área saude no edukasaun nian oinsá atu diskute nune’e bele rezolve problema soe bebé ne’e,” Prezidente GMPTL, Lídia Norberta dehan.

Nia hatutan, hosi soru-mutuk ida-ne’e atu tau hanoin hosi maluk sira-ne’ebé mak envolve diretamente hodi fó apoiu ba bebé sira no fiar katak ho envolvimentu ne’e bele solusiona kazu soe bebé.

Aleinde ne’e, GMPTL envolve mós parte Polísia Nasionál Timor-Leste (PNTL) liuliu parte investigasaun kriminál sira-nia hanoin tanba durante ne’e parte refere mós fó apoiu maka’as tanba bainhira ema ruma soe bebé sira mak to’o diretamente iha fatin akontesimentu hodi halo investigasaun.

“Ita envolve mós parte PNTL nian liuliu maluk sira investigasaun kriminál ninian tanba bainhira akontese iha parte balun soe bebé, sira mak tun diretamente iha fatin akontesimentu. Entaun, parte hirak-ne’e ita tenke envolve hotu hodi fó

Baca Juga : Polisia tiru mate ema nain tolu no hakanek nain lima Julio Hornay kondena makas

hanoin hamutuk. Ita presiza intensifika ba lei. Ita presiza intensifika ba saúde reprodutiva. Ita presiza intensifika ba edukasaun ida-ne’ebé mak inkluzivu duni iha Ministériu Edukasaun,” deputada ne’e subliña.

Lídia hatutan, iha nasaun barak ema komesa hanorin ona edukasaun sexuál ba labarik menór idade sira kona-ba sé mak bele kaer ema feto ida nia isin no sé mak labele kaer labarik feto ida nia isin.

“Ema ne’ebé labele kaer o nia isin mak nia kaer o nia isin tama ona ba iha kategoria asédiu sexuál. Entaun, ita agora iha lei asédiu sexuál maibé presiza mós intensifika iha nível edukasaun nian hodi introdús ba ema seluk,” nia haklaken.

Nia haktuir, iha Timor-Leste kazu soe bebé númeru aas liu iha era ukun rasik an tanba iha tempu okupasaun Indonézia no koloniál Portugés, kazu refere ladún akontese maski ema balun kaben ho feto rua ba leten.

“Ita haree iha era ida agora, ema soe bebé ne’e iha númeru ida-ne’ebé mak aas. La’ós labarik klosan sira de’it maibé kaben-na’in sira balun mós soe bebé,” nia haktuir.