Durante tinan rua (2017-2019) ona Liga Voleiból Timor-Leste paradu. Tanba ne’e, treinadora voleiból hosi klube Primeira Divizaun Kablaki feto no mane, Célia Lopez Mahaquidan hateten liga refere la la’o kauza hosi problema interna balun.

“Tuir ha’u-nia haree, tinan rua ona liga voleiból paradu talvez kauza hosi interna balun hosi Sekretaria Estadu Juventude no Desportu no órgaun Liga. Ami hanesan klube hein de’it Liga ne’e bainhira mak la’o fali mós konvite mai ami prontu partisipa nafatin,” tenik Célia ba Agência Tatoli iha Hotel Timor, Dili, tersa ne’e.

Maski Liga la la’o maibé preparasaun klube nian hala’o nafatin.

“Hanesan treinadora, ami-nia preparasaun ba jogadór sira la’o nafatin. Ha’u sempre hakbesik-aan ba sira. Maski Liga paradu maibé ami-nia treinu la’o hela. Ami-nia klube Kablaki sempre forsa no espíritu forte nafatin tanba hetan suporta hosi família, kolega, patrosinadór no estrutura klube nian,” nia

Baca Juga : Produsaun Filme Hanesan Harii Uma

haktuir.

Haree ba liga paradu kle’ur demais, hanesan treinadora, nia sente triste tanba loloos Governu no órgaun Liga tenke tuur hamutuk hodi rezolve problema interna balun karik mosu, nune’e Liga bele la’o hodi involve joven sira para bele kapasita di’ak liután talentu joven sira iha mundu desportiva.

“Hanesan joven, ha’u sei hakarak involve-aan iha desportu sira. Desportu hanesan ai-moruk hodi kura moras sira iha ita-nia isin lolon. Desportu bele halo ita saudável,” nia subliña.

Nia hatutan, sai treinadora la’ós buat ne’ebé fásil tanba difikuldade barak mak nia hasoru durante ne’e maibé la sai obstákulu hodi hakat ba oin.

Entretantu, fó hanoin fali, apuramentu ba Liga Voleiból hala’o iha tinan 2016 no Liga loloos hala’o iha 2017, maibé paradu lahó razaun fundamentu.