-Ministériu Saúde, kuarta ne’e deskobre tan pasiente konfirmadu COVID-19 maihosi Indonézia ho tinan 23 .

Ministra Saúde, Odete Maria Freitas Belo, hateten ho kazu foun ne’e, Timor-Leste rejista kazu konfirmadu COVID-19 hamutuk 27,  na’in 25 rekuperadu no na’in rua sei halo tratamentu iha sala izolamentu Sentru Saúde Vera Cruz Dili.

”Sidadaun Indonézia  mane ho idade 23 serbisu tékniku  iha kompaña Wartsila,

Sidadaun ne’e hahú viájen husi Jakarta  mai Kupang Indonézia ho voo Batik Air iha loron 11 agostu 2020,” dehan Governante durante konferénsia imprensa iha Palasiu Sinzas Caicoli Dili.

No iha loron 11 fulan-agostu pasiente ne’e halo tan viájen husi Kupang-NTT mai Atambua no hela iha Otél Matahari, depois kontinua viájen mai Dili iha loron 12 fulan-agostu 2020.

”Totál pasajeiru sira ne’ebé tama iha loron 12 agostu 2020 hamutuk ema na’in 84, no na’in hitu tama auto-kuarentena iha Otél Garden Beach no na’in 77 iha konfinamentu obrigatóriu no pasiente ne’e rasik kompleta ona loron 14,” katak Ministra.

Kazu foun ne’e identifikadu hafoin pesoál saúde sira foti tan amostra ba dala ikus iha loron 22 tanba ne’e maka deteta pasiente ne’e kona surtu COVID-19.

“Informasaun  ne’ebé mak ami buka tuir katak pasiente ne’e kontaktu ho ema besik na’in 14, husi na’in 14 ne’e na’in neen ne’ebé mak sira hela hamutuk iha otél no na’in ualu seluk mak hanesan ema ne’ebé mak limpeza, tein

Baca Juga : Ahi-Suar Manas Iha Fahi-Lebo Hahú Menus

no otél na’in,” hateten Odete.

Hodi hatutan atu prevene transmisaun iha komunidade nia leet maka daudaun ne’e médiku sira kontaktu ona ema na’in 14 ne’e para foti amostra hodi halo teste laboratóriu.

Entretantu, iha loron 20 fulan-agostu 2020 liubá, Ministériu Saúde deteta Estudante Timoroan ida ho kazu COVID-19 pozitivu durante implementasaun Estadu Emerjénsia dahaat iha TL.

Pasiente ne’e ho ninia viájen maihosi Denpasar Bali Indonézia iha loron 05 fulan-agostu hamutuk ho traballadór Timoroan iha Korea Súl, Estadu Unidu Amérika no Portugal ho Aviaun Citilink ne’ebé Governu liuhosi SEFOPE aluga  mai Timor-Leste.

Nune’e mós iha loron 04 fulan-agostu Ministériu Saúde liuhosi Komisaun Ezekutivu Saúde ba Surtu COVID-19, deteta sidadaun Indonézia dahuluk ho tinan 43 konfirmadu COVID-19.

Sidadaun mane ne’e maihusi Java Sentrál Indonézia  ho aviaun Citilink to’o iha Kupaun, Nusa Tenggara Timur (NTT) iha loron 21 fulan-jullu no iha loron 22 fulan hanesan tama iha territóriu Timor-Leste liuhosi fronteira terrestre Motain, Munisípiu Bobonaro.

Pasiente ne’e konfirmadu pozitivu iha loron 04 fulan-agostu hodi submete kedas ba iha izolamentu, iha loron hanesan  ekipa saúde halo teste dala rua tutuir malu rezultadu pozitivu.

Fontes Noticia: Tatoli.tl