Segundu Komandante Polisia Nasional Timor-Leste (PNTL) Munisípiu Dili, Superintendente Asistente, Euclides Belo, relata katak, PNTL kaptura suspeitu RP iha nia hela fatin iha area Becora, Dili, tuku 11:00 Otl, hodi kumpre mandadu detensaun ho númeru NUK 0027/20/DIL.

Parte polisia simu informasaun husi ema balun katak, suspeitu foti labarik mane ida ho inisiál DR hodi fa’an ba família ho montante $400.00

“Kazu ne’e akontese iha semana kotuk liubá, nune’e PNTL rejistu ho estatutu fa’an labarik mane ida ho inisiál DR. Labarik ne’e foin tinan ida ho balun no PNTL rekolla informasaun hodi promove no buka halo identifikasaun no husu autorizasaun ba tribunál hodi hasai mandatu kapturasaun ba suspeitu,” hateten Segundu Komandante PNTL Munisípiu Dili, Euclides Belo, ohin, ba jornalista sira.

Parte PNTL deskonfia suspeitu

Baca Juga : 2019, Timor-oan 991 Pozitivu HIV/SIDA

envolve iha kazu krime fa’an labarik ne’ebé previstu iha artigu 166. Nune’e tuir lei, PNTL halo detensaun oras 72 nia laran hodi submete ba investigasaun no sei lori kazu ne’e ba Ministériu Públiku.

Euclides hatutan, parte investigadór sira mós bolu ona sasin liu-liu família husi labarik ne’e hodi fó informasaun klaru ba PNTL.

Nia hatutan, bazeia ba investigasaun provizóriu ne’ebé PNTL halo deskonfia suspeitu ne’e ba foti labarik DR husi ninia inan ne’ebé sofre hela moras mentál no agora hala’o hela tratamentu saúde iha Sentru Saúde Reabilitasaun Mentál Laclubar-Manatuto atu fó ba família balun haree, maibé ikus mai suspeitu lori fali labarik fa’an ba família seluk.

PNTL rasik identifika labarik ne’e suspeitu fa’an ba ninia família balun, maibé tuir lei la nesesáriu atu suspeitu foti labarik ki’ik husi nia inan no fa’an ba kualkér ema nu’udar krime.