Conteudo Seluk

Planu Harii Sidade Universitaria Nain Ba Rai Ami Lakohi Fo Tanba Ami-nia Moris

Governu planea atu harii Sidade Universitária iha Suku Bandodatu, Postu Administrativu Aileu Vila, Munisípiu Aileu. Maske nune´e, Na´in ba rai, Fátima Xavier hateten, uma-ka´in 59 mak sei afeta ba planu konstrusaun ne´e no hateten mós katak nu´udar sidadaun la´ós lakohi dezenvolvimentu maibé “rejeita” oferese rai tanba poténsia ba agrikultura ne´ebé sira uza husi jerasaun ba jerasaun no mós iha Munisípiu Aileu, ema la fa´an rai arbiru.
“Ba dezenvolvimentu ami prontu simu, rai ne’e ami nian, ami-nia avó sira hela, iha tinan 1920. Kona-ba rai atu harii sidade universidade ne’e rai mamuk iha ne’ebá, rai Estadu nian duni (zona besik rai identifikadu ba sidade universitária- red ) iha kedas tempu okupasaun portugés nian, ne’ebé ami ne’ebé haree hela durante ne’e, ami prontu atu entrega ba estadu no ami sei la husu osan. Maibé rai ida hamutuk hektare 22 ne’e ami-nia rain rasik, rai eransa,” dehan Na´in ba rai, Fátima Xavier iha, Suku Bandudato, Aileu, ba Ajénsia TATOLI, ohin.
Fátima Xavier hatutan, sira hamutuk uma-kain 59 lakohi fó rai tanba rai ne’e maka dezde uluk to´o agora fó moris ba sira lorloron katak halo to’os hodi kuda batar, ai-farina, koto, fore, kontas, fehuk no modo hodi ba sustenta família.
“Ami lakohi fó tanba ne’e ami-nia moris mak ne’e ona bainhira Estadu foti tiha ami atu lori moris ho saida? Ami sente triste tebes no fuan moras, kalan ami toba ladukur tanba hanoin de’it katak bainhira Estadu mai foti duni ami atu ba hela

Baca Juga : Obralan Ai Mutin sei muda ba Manleuana

iha ne’ebé, tanba ami-nia oan no beioan sira barak no sira boot atu ba hela iha ne’ebé? Ami triste tebes,” hateten Fátima ho triste.
Fátima dehan, bainhira governu tuun ba halo negosiasaun promete atu fó indemnizasaun. “Sira mai promete katak sei fó indemnizasaun maibé ami lakohi tanba ne’e ami-nia rai eransa ne’ebé ami sei la fó tanba ami-nia rain maka ne’e de’it ona, rai sira iha foho mós ema nian hotu, governu bele mai fó osan ami maibé ami ba sosa maka ema la fa´an ami atu ba loos ne’ebé? Primeiru Ministru rasik mai ona ko´alia ho ami mas seidauk iha solusaun”.
Na´in ba rai sira mós konsidera katak bainhira estadu uza forsa hodi hasai sira maka estadu la rekoñese nia povu rasik. “Rai ne’e luan tebes no ami hela iha oin ne’ebé Estadu atu foti karik foti iha uma kotuk nian no hosi ami-nia uma ne’ebé iha ami hela ba, maibé sira hakarak atu hasai hotu ami hosi fatin ne’e maka ami lasimu,” afirma nia.
Tuir observasaun TATOLI iha terrenu katak, maske parte governu ho rai na´in seidauk iha konkordánsia, maibé hosi tékniku Terras no Propriedade tau ona marka ba uma hirak ne’ebé sei afeta ba konstrusaun refere.
Entretantu, ha loron 14 novembru 2019 ne’e Primeiru-Ministru (PM), Taur Matan Ruak tuun direta ona hodi rona preokupasaun hosi na´in ba rai sira.

0 Comments

Sign In Sign Up Sign In By Facebook